New ration card 2026-ವೈದ್ಯಕೀಯ ತುರ್ತು ಚಿಕಿತ್ಸೆಗಾಗಿ 7 ದಿನದೊಳಗೆ ಸಿಗಲಿದೆ ಹೊಸ ಬಿಪಿಎಲ್‌ ಕಾರ್ಡ್

New ration card 2026-ವೈದ್ಯಕೀಯ ತುರ್ತು ಚಿಕಿತ್ಸೆಗಾಗಿ 7 ದಿನದೊಳಗೆ ಸಿಗಲಿದೆ ಹೊಸ ಬಿಪಿಎಲ್‌ ಕಾರ್ಡ್

ಬಿಪಿಎಲ್‌ ಕಾರ್ಡ್‌ ಹೊಂದಿದವರು ಸರಕಾರಿ ಆಸ್ಪತ್ರೆಗಳಲ್ಲಿ ಉಚಿತವಾಗಿ ಹಾಗೂ ಖಾಸಗಿ ಆಸ್ಪತ್ರೆಗಳಲ್ಲಿ ರಿಯಾಯಿತಿ ದರದಲ್ಲಿ ನಾನಾ ಪರೀಕ್ಷೆ, ಚಿಕಿತ್ಸೆ ಸೌಲಭ್ಯ ಪಡೆಯುವುದಕ್ಕೆ ಸರಕಾರ ಎಂದೋ ಅವಕಾಶ ಕಲ್ಪಿಸಿದೆ. ಆದರೆ, ರಾಜ್ಯದ ಅನೇಕ ಫಲಾನುಭವಿಗಳು ಅರ್ಜಿ ಸಲ್ಲಿಸಿದ್ದರೂ ಇದುವರೆಗೆ ಬಿಪಿಎಲ್‌ ಕಾರ್ಡ್‌ ಪಡೆಯಲು ಸಾಧ್ಯವಾಗಿಲ್ಲ. ಇಂತಹ ಕುಟುಂಬಗಳಿಗೆ ವೈದ್ಯಕೀಯ ತುರ್ತು ಚಿಕಿತ್ಸೆಯ ಅಗತ್ಯ ಬಿದ್ದಾಗ ಬಿಪಿಎಲ್ ಕಾರ್ಡ್‌ ಇಲ್ಲ ಎಂಬ ಕಾರಣಕ್ಕೆ ಚಿಕಿತ್ಸೆಯ ನಾನಾ ಸವಲತ್ತುಗಳು ದೊರೆಯದಂತಾಗಿತ್ತು

ಇದನ್ನು ತಪ್ಪಿಸಲೆಂದೇ ಸರಕಾರ ಇತ್ತೀಚೆಗೆ ವೈದ್ಯಕೀಯ ತುರ್ತು ಘಟಕದ ಸಾಫ್ಟ್‌ವೇರ್‌ ಸಿದ್ಧಪಡಿಸಿದೆ. ವೈದ್ಯಕೀಯ ಸೌಲಭ್ಯಕ್ಕಾಗಿ ಕರ್ನಾಟಕ ಒನ್‌, ಗ್ರಾಮ ಒನ್‌ಗಳ ಮೂಲಕ ಕಾರ್ಡ್‌ ನೀಡಲಾಗುತ್ತಿದೆ. ಆಧಾರ್‌ ಕಾರ್ಡ್‌, ಆದಾಯ ಪ್ರಮಾಣ ಪತ್ರ ಮತ್ತು ವೈದ್ಯಕೀಯ ದಾಖಲೆಗಳನ್ನು ವೈದ್ಯಕೀಯ ತುರ್ತು ಘಟಕಕ್ಕೆ ಸಲ್ಲಿಸಿ ಏಳು ದಿನದೊಳಗೆ ಬಿಪಿಎಲ್‌ ಕಾರ್ಡ್‌ ಪಡೆಯಲು ದಾರಿ ಮಾಡಿಕೊಟ್ಟಿದೆ.

ಮತ್ತೊಂದೆಡೆ ಸುಳ್ಳು ದಾಖಲೆಗಳನ್ನು ಒದಗಿಸುತ್ತಿರುವ ಹಿನ್ನೆಲೆ ಅರ್ಜಿ ತಿರಸ್ಕೃತಗೊಳ್ಳುವುದು ಬೆಳಕಿಗೆ ಬರುತ್ತಿವೆ. ಇಂತಹ ಪ್ರಕರಣಗಳು ರಾಜ್ಯಾದ್ಯಂತ ಕಂಡುಬಂದಿದ್ದು, ವಾಮಮಾರ್ಗದ ಮೂಲಕ ಕಾರ್ಡ್‌ ಪಡೆಯಲು ಯತ್ನಿಸಿ ವಿಫಲವಾಗುತ್ತಿರುವುದು ಆಹಾರ ನಿರೀಕ್ಷಕರ ಪರಿಶೀಲನೆ ಸಂದರ್ಭ ಬೆಳಕಿಗೆ ಬರುತ್ತಿವೆ.

ಅರ್ಜಿ ಸಲ್ಲಿಕೆ ವಿವರ

ರಾಜ್ಯಾದ್ಯಂತ ಮೆಡಿಕಲ್‌ ಎಮರ್ಜೆನ್ಸಿ ಮಾಡ್ಯುಲ್‌ ಮೂಲಕ ಬಿಪಿಎಲ್‌ ಕಾರ್ಡ್‌ ಪಡೆಯಲು ಅವಕಾಶ ದೊರೆತ ದಿನದಿಂದ ರಾಜ್ಯಾದ್ಯಂತ 5,677 ಅರ್ಜಿಗಳು ಫಲಾನುಭವಿಗಳಿಂದ ಸಲ್ಲಿಕೆಯಾಗಿದ್ದು, ಅರ್ಜಿ ಹಾಕಿದ ಬೆನ್ನಲ್ಲೇ 203 ಜನ ಹಿಂಪಡೆದಿದ್ದಾರೆ. ಈ ಅವಕಾಶದಡಿ ಬಿಪಿಎಲ್‌ ಕಾರ್ಡ್‌ ಕೋರಿ ಅರ್ಜಿ ಹಾಕಿದ 2327 ಅರ್ಜಿದಾರರ ಸ್ಥಳ ತಪಾಸಣೆ ಮಾಡಿದ್ದು, 906 ಅರ್ಜಿಗಳು ಅಧಿಕೃತವಾಗಿ ಅನುಮೋದನೆಗೊಂಡಿವೆ. ಇದೇ ವೇಳೆ ಸುಳ್ಳು, ಅಸ್ಪಷ್ಟ ದಾಖಲೆ ಒದಗಿಸಿದ ಕಾರಣಕ್ಕೆ 706 ಅರ್ಜಿಗಳು ತಿರಸ್ಕೃತಗೊಳ್ಳುವಂತಾಗಿದೆ. ಹಾಗಾಗಿ, ರಾಜ್ಯಾದ್ಯಂತ ಇವತ್ತಿನವರೆಗೆ ಇನ್ನೂ 4065 ಅರ್ಜಿಗಳನ್ನು ಪರಿಶೀಲಿಸಿ ಕಾರ್ಡ್‌ ಕೊಡುವ ಕಾರ್ಯ ಬಾಕಿ ಇದೆ.

ಮಧ್ಯವರ್ತಿಗಳ ಹಾವಳಿ

ಸದುದ್ದೇಶಕ್ಕಾಗಿ ಆರಂಭಿಸಿದ ಮೆಡಿಕಲ್‌ ಎಮರ್ಜೆನ್ಸಿ ಮಾಡ್ಯೂಲ್‌, ಅರ್ಹರಿಂದ ಸಮರ್ಪಕ ಬಳಕೆಯಾಗುತ್ತಿಲ್ಲಎಂಬ ದೂರುಗಳು ಕೇಳಿಬಂದಿರುವುದು ಒಂದೆಡೆಯಾದರೆ ಮಧ್ಯವರ್ತಿಗಳು ಫಲಾನುಭವಿಗಳನ್ನು ದಾರಿ ತಪ್ಪಿಸಿ ಸುಳ್ಳು ದಾಖಲೆ ಸಲ್ಲಿಸುತ್ತಿರುವುದು ಇಲಾಖೆಗೆ ತಲೆನೋವಾಗಿ ಪರಿಣಮಿಸಿದೆ. ಇದರಿಂದ ಪ್ರತಿ ಅರ್ಜಿಯೊಂದಿಗೆ ಲಗತ್ತಿಸಿದ ಆಧಾರ್‌ ಕಾರ್ಡ್‌, ಆದಾಯ ಪ್ರಮಾಣಪತ್ರದ ಜತೆಗೆ ಮುಖ್ಯವಾಗಿ ವೈದ್ಯಕೀಯ ದಾಖಲೆಗಳನ್ನು ಕೂಲಂಕಷವಾಗಿ ತಪಾಸಣೆ ಮಾಡುವಂತಾಗಿದೆ.